ឥទ្ឋិពលនៃថ្នាំញៀនធ្វើអោយយុវជនម្នាក់ វង្វេងស្មារតី​ ធ្វើអត្តឃាតចងក សម្លាប់ខ្លួន

ខេត្តកណ្តាល៖ ករណីអត្តឃាតនេះបង្ករការភ្ញាក់ផ្អើលកាលពី វេលាម៉ោង៥និង៣០នាទីទាបភ្លឺ ថ្ងៃទី១២ ខែមិថុនា ឆ្នាំ២០១៨នេះ ស្ថិតនៅក្នុងភូមិរំលេច ឃុំទួលព្រេជ ស្រុកអង្គស្នួល ខេត្តកណ្តាល។
នគរបាលស្រុកអង្គស្នួលបានឲ្យដឹងថា ជនរងគ្រោះមានឈ្មោះ ស៊ីម សិត ភេទប្រុស អាយុ២៥ឆ្នាំ នៅលីវ មុខរបរកសិករ រស់នៅភូមិឃុំកើតហេតុខាងលើ។
ប្រភពដដែលបានបន្តថា តាមការសួរបំភ្លឺពីឪពុកជនរងគ្រោះបានឲ្យដឹងថា មុនពេលកើតហេតុកន្លងមក ជនរងគ្រោះបានប្រើប្រាស់ថ្នាំញៀនលើសកំណត់រហូតវង្វេងវង្វាន់ស្មារតី បានទិញស្រាថ្នាំមួយលីត្រមក ផឹកម្នាក់ឯង បានទៅដេកនៅគ្រែក្រោមផ្ទះ។ លុះព្រឹកឡើងឪពុកជនរងគ្រោះភ្ញាក់ពីដេក ក៏ដើរមករោង យកចំបើងឲ្យគោស៊ីស្រាប់តែឃើញជនរងគ្រោះ យកខ្សែអង្រឹងប្រវែងបួនម៉ែត្រចងកនឹងធ្នឹម រោងចំបើង ស្លាប់បាត់ទៅហើយ។

​ក្រោយពីទទួលបានព័ត៍មាន សមត្ថកិច្ចនគរបាលស្រុកអង្គស្នួលចុះដល់កន្លែងកើតហេតុ ហើយបាន ពិនិត្យយ៉ាងយកចិត្តទុកដាក់ឃើញថា សពពុំមានស្នាកស្នាមអ្វីពាក់ព័ន្ធនិងបទល្មើសផ្សេងៗឡើង គឺជនរងគ្រោះពិតជាស្លាប់ដោយសារធ្វើអត្តឃាតចងកប្រាកដមែន។ សពបានប្រគល់ទៅឲ្យក្រុមគ្រួសារ យកទៅធ្វើបុណ្យតាមប្រពៃណី៕​